Rexenerando S. Coop. Galega

"Somos cooperativa porque acreditamos nos principios da economía social e porque sabemos que xuntas somos máis fortes. Apoiámonos en perfís profesionais diversos e complementarios para ofrecer servizos cos que acompañar a transformación da realidade sobre a base de valores de xustiza, equidade e diversidade. A nosa vocación é facer camiño rexenerando historias, vínculos, saberes e comprometéndonos coas comunidades das que facemos parte. Facémolo poñendo o foco en tres grandes eixos: a participación social, o feminismo e historias subalternizadas. Desde aquí deseñamos e implementamos proxectos socio-educativos e culturais diversos mais co denominador común da procura de procesos de cambio social. Desde a facilitación e xestión de grupos á formación para a igualdade entre homes e mulleres; do traballo cos corpos e as artes vivas ao deseño gráfico; da interpretación do patrimonio á participación cidadá. Un feixe de sementes que espallamos coa vontade de rexenerar o mundo e as nosas vidas. "